Ralf Gjoni përjashtohet 10 ditë nga seancat plenare

Byroja e Kuvendit vendosi pasditen e së martës të përjashtojë për 10 ditë nga seancat parlamentare deputetin Ralf Gjoni.

Kërkesa për përjashtimin e tij u bë nga 7 deputetë të mazhorancës: Evis Kushi, Vasilika Hysi, Almira Xhembulla, Ardiana Jaku, Artemis Malo, Vilma Bello dhe Elona Hoxha.

Përjashtimi ka ardhur pas debateve që u bënë javën e shkuar rreth raportimit vjetor të Komisionerit për të Drejtën e Informimit dhe Mbrojtjen e të Dhënave Personale, Besnik Dervishi.

Gjoni këmbënguli disa herë t’i bënte pyetje nga vendi, por ai u ndalua nga Kryetari i Parlamentit Gramoz Ruçi me pretendimin se pyetjet duhet t’i ishin adresuar Dervishit me shkrim.

Mirëpo Gjoni pretendoi se rregullorja e Kuvendit nuk e parashikonte një gjë të tillë duke ngritur zërin dhe shprehur hapur pakënaqësinë për moslejimin e pyetjeve.

Shtatë deputetët e  mazhorancës pretendojnë se përveç kësaj, Gjoni ka shfaqur mungesë etike duke i hedhur dokumentet një punonjëse të administratës së Kuvendit e cila iu afrua t’i sqaronte situatën.

Gjoni e konsideroi përjashtimin si “masë ndëshkuese për akuzat që ai ka bërë për Teatrin Kombëtar”.

“Jam përjashtuar sepse kërkova të parashtroja disa pyetje mbi transparencën e shembjes së Teatrit ndaj Komisionerit për të Drejtën e Informimit Besnik Dervishi ashtu siç më jep të drejtë Pika 7 e Nenit 103 të Rregullores së Kuvendit,” – u shpreh Gjoni në një postim në Facebook.

Përjashtimi i deputetit vjen një ditë përpara interpelancës me Kryeministrin Edi Rama të thirrur nga 11 deputetë të opozitës parlamentare rreth çështjes së shembjes së Teatrit Kombëtar.

Lexoni gjithashtu:

Shembja e Teatrit Kombëtar, nesër opozita parlamentare interpelancë me Kryeministrin Rama

Ralf Gjoni kërkon komision hetimor për shembjen e Teatrit Kombëtar

Shembja e Teatrit, deputeti Ralf Gjoni: U bë me marrëveshje mes Ramës dhe Bashës