Shtyrja e kësteve të kredisë, Banka e Shqipërisë sqaron vendimin e firmosur me Ramën

Kryeministri i vendit, Edi Rama dhe Guvernatori i Bankës së Shqipërisë, Gent Sejko firmosën sot masa të tjera lehtësuese për qytetarët, duke shtyrë pagesën e kësteve të kredive me tre muaj të tjerë.

Masa lehtësuese janë parashikuar edhe për bizneset dhe për bankat e nivelit të dytë, të cilat kanë hasur në probleme të shtuara për shkak të pandemisë globale të COVID-19.

Banka me një njoftim të shpërndarë për mediat ka zbardhur detajet e vendimit të firmosur sot me kryeministrin Rama, ndërsa zotohet se do të jetë aktive dhe në mbështetje të drejtëprdrejtë ndaj qytetarëve e bizneseve të vendit.

Masat lehtësuese të Bankës së Shqipërisë

-Pezullimit të përkohshëm të zbatimit të detyrimit që rrjedh nga kërkesat për administrimin e rrezikut të kredisë, për klasifikimin dhe provigjionimin e kredive për të gjitha kategoritë e klientëve, edhe për një periudhë tjetër, nga data 1 qershor deri në 31 gusht 2020, për arsye të vështirësive financiare dhe rënies së aftësisë paguese të huamarrësve, ndikuar nga situata e krijuar.

-Pezullimit të përkohshëm të krijimit të fondeve rezervë për pasuritë e paluajtshme të përftuara kundrejt shlyerjes së kredive deri në muajin dhjetor 2020.

-Dispozitë lehtësuese për kreditë e ristrukturuara, sipas së cilës bankave u jepet mundësi të ristrukturojnë marrëdhëniet aktuale të kredive me qëllim gjetjen e zgjidhjeve të përshtatshme në varësi të aftësisë paguese të kredimarrësve deri më 31 dhjetor 2020 pa kosto shtesë të provigjoneve dhe pa përkeqësim të statusit të huamarrësve. 

-Shtyrjen me 1 vit të hyrjes në fuqi të kërkesave më të shtrënguara për klasifikimin dhe provigjionimin e kredive të ristrukturuara, për në muajin janar 2022. Nëpërmjet kësaj mase bankat do të mund të përdorin edhe gjatë vitit 2021 të njëjtat kritere për klasifikimin dhe provigjionimin e kredive të ristrukturuara si ato përpara situatës së pandemisë.

-Shtyrjen me 1 vit të efekteve të rregullores “Për trajtimin jashtëgjyqësor nga bankat, të kredimarrësve në vështirësi financiare” deri në muajin janar 2022. Në këtë mënyrë, bankat do të kenë një hapësirë më të madhe kohore të gjejnë një zgjidhje të përshtatshme për huamarrësit e përbashkët në vështirësi financiare.

Banka Qendrore thekson më tej se “kredimarrësit, aftësia paguese e të cilëve nuk preket apo dëmtohet nga kjo situatë duhet të vijojnë normalisht shlyerjen e detyrimeve të tyre me bankat”.

Lexoni gjithashtu: 

Edi Rama firmos vendimin me Bankën e Shqipërisë, shtyhen sërish me tre muaj këstet e kredive