Meta: Ligji për turizmin dhe koncesionin e Porto Romanos jo kushtetuese

Presidenti Ilir Meta shpjegoi mesditën e së premtes se përse ktheu për rishqyrtim ligjin për turizmin detar dhe ligjin për koncesionin e Porto Romanos.

Në një konferencë për shtyp në mjediset e Presidencës, Meta tha se ligji për turizmin detar cenon identitetin kombëtar pasi përdoren fjalë të huaja që nuk janë të gjuhës shqipe, po kështu ai tha se kishte kthyer mbrapsht në parlament ligjin e koncesionit të Porto Romanos pasi negociohet vetëm me një subjekt duke cenuar konkurrencën.

“Fusha e aktiviteteve të turizmit duhet të zhvillohet në një mjedis të sigurt juridik, por nuk e garanton kjo me Kushtetutën. Përdorimi në gjuhë të huaja, i shkronjave që alfabeti jonë nuk i njeh, jo vetëm shkel gjuhën shqipe por edhe identitetin kombëtar. Kuvendi të reflektojë!” – tha Meta.

“Koncesioni në Porto Romano. Si dhe për koncesionet e tjera, anashkalon procedurat e hapura për koncesionet dhe partneritetin publik-privat duke hyrë vetëm me një subjekt. Cenon konkurrencën e lirë, Kodin Detar dhe Sigurinë Mjedisore. Kanë ardhur shqetësime edhe nga kontraktorë të tjerë por edhe Komisioni Europian mbi procedurat e ndjekura nga ky ligj. Kuvendi i Shqipërisë duhet t’i shqyrtojë dhe ankesat,” – tha Presidenti, teksa u ndal edhe për çështjen e Teatrit Kombëtar për të cilin tha se kishte zhvilluar një videokonferencë me Europa Nostran, duke ritheksuar kërkesën për hetim ndërkombëtar.

Lexoni gjithashtu:

Meta e cilëson domosdoshmëri hetimin ndërkombëtar të shembjes së teatrit