Hajdari: Rama e Basha nuk nuk e duan ndryshimin e sistemit

Deputetja e opozitës parlamentare Rudina Hajdari nuk e fshehu zhgënjimin mbrëmjen e së shtunës teksa tryeza e reformës zgjedhore u mbyll sërish pa dakordësi për shumë çështje.

Në dalje prej saj, ajo u tha mediave se si Partia Socialiste edhe Partia Demokratike kishin hedhur poshtë propozimet e saj për ndryshime të sistemit apo dhe hapje të listave të kandidatëve në zgjedhje.

“Sot propozova një formulë të mbështetur edhe nga ndërkombëtarët dhe nga SHBA-të dhe hap pjesërisht listën, por dhe këtë ma hodhën poshtë,” – u shpreh e revoltuar Hajdari teksa e justifikoi këtë refuzim me “frikën që partitë e mëdha kanë nga zgjedhjet e lira”.

“E kuptoj fare mirë Ramën që nuk do pasi është bërë i gjithëpushtetshëm me këtë sistem, por nuk kuptoj Lulzim Bashën pse e do këtë sistem që e ka bërë Ramën perandor,” – argumentoi më tej Hajdari duke u shfryrë se pas 30 vitesh qytetarët shqiptarë e meritojnë të dërgojnë atë që duan në parlament dhe jo atë që do kryetari i një partie.

Deputetja, e cila me Damian Gjiknurin është bashkëkryetarë e Komisionit Parlamentar të Reformës Zgjedhore, ka deklaruar në të shkuarën se nuk do ta votojë reformën nëse nuk do të ketë në të ndryshime të sistemit.

Megjithëse ka edhe 1 ditë kohë nga përfundimi i afatit të caktuar për draftimin e reformës, Hajdari këmbënguli se do të vazhdojë “të luftojë për ndryshimin e sistemit”.

Lexoni gjithashtu:

Nuk ka dakordësi në Këshillin Politik, opozita akuzon mazhorancën se refuzoi të gjitha propozimet

Gjiknuri: I kemi ofruar opozitës hapjen e kutive në rast kontestimesh të rezultatit