PD mbledh grupin parlamentar për presidentin, Boçi: Nul, Alibeaj i shkarkuar

Sot në orën 17:00 do të mblidhet grupi parlamentar i Partisë Demokratike. Në mbledhjen pritet të diskutohet për procesin e zgjedhjes së presidentit, ku një ditë më parë u mbajt edhe Konferenca e Kryetarëve.

Mbledhjen e thirrur nga kreu i grupit parlamentar demokrat Enkelejd Alibeaj, deputeti Luçiano Boçi e ka konsideruar nul, duke i kujtuar vendimin e shkarkimit në kuvendin e 30 prillit.

“Zoti Alibeaj ka tagrin e Ramës dhe të Ballës, por nuk ka tagrin e demokratëve te cilët e kanë shkarkuar atë në Kuvendin e datës 30 Prill. Së dyti mbledhjen e grupit e thërret Kryesia e Grupit dhe jo një deputet, qoftë ai i njohur nga Rama si përfaqësues grupi. Prandaj nga ky moment kërkoj në ditët në vazhdim thirrjen e mbledhjes së Kryesisë së Grupit, për të diskutuar e vendosur për mbledhjen e Grupit Parlamentar. Grupi parlamentar i PD nuk mund të mblidhet sa herë e kërkon e kur e kërkon Rama-Balla”, shprehet Boçi.

Ndërkohë, nga Fieri kreu i grupit parlamentar të PS, Taulant Balla deklaroi se kryetari i ri i shtetit duhet të jetë një figurë e pranuar nga të gjithë shqiptarët.

LEXONI GJITHASHTU:

• Presidenti, Bylykbashi: Alibeaj asnjë tagër politik për të përfaqësuar PD-në
• PS nis bisedimet me opozitën për Presidentin e ri, Rama: Të hapur për emra