Caktimi i gjyqtares për statutin e PD-së, reagon ish-kryeministri Berisha

Ish-kryeministri Sali Berisha ka reaguar pas caktimit të gjyqtares e cila do të shqyrtojë në Apel, ankimin e kreut të Grupit Parlamentar të PD-së, Enkelejd Alibeaj për mos njohjen e statutit të dalë nga Kuvendi i Dhjetorit të vitit 2021.

Përmes një postimi në rrjetet sociale, Berisha shprehet se deklarata e bërë nga Gjykata e Apelit 2 orë para hedhjes së shortit për caktimin e gjyqtares, tregon ndërhyrjen politike të kryeministrit Edi Rama.

Gjithashtu, ish-kryeministri akuzon edhe ambasadoren amerikane Yuri Kim për ndërhyrje antikushtetuese.

Sipas tij, Gjykata e Tiranës nuk i ka dhënë PD-së një kopje të vendimit të gjykatëses Blerina Muça, e cila e ktheu çështjen për shqyrtim.

Berisha thotë se kjo është në kundërshtim flagrant me ligjet e vendit.

Elona Toro do të jetë gjyqtarja e cila do të shqyrtojë ankimin e bërë nga Enkelejd Alibeaj. Toro u caktua për shqyrtimin e kësaj çështjeje, nga hedhja e shortit këtë të martë.

Shorti përcaktoi se trupa gjykuese do përbëhet edhe nga gjyqtaret Edlira Petri dhe Genti Shala.

LEXONI GJITHASHTU

• Caktohet gjyqtarja që do të shqyrtojë ankimin e Alibeajt për statutin e PD-së
• Alibeaj ankimon vendimin e Gjykatës që legjitimoi Kuvendin e Berishës
• Gjykata njeh Kuvendin Kombëtar të Berishës