Policia polake mbron paradën e LGBT-së nga situata e tensionuar përpara zgjedhjeve

Protestuesit polakë kundër LGBT janë përplasur me policinë në qytetn juglindor të Lublin ditën e shtunë, pak para se të niste një marshim krenarie nga homoseksualët.

Policia njofton se askush nuk është lënduar gjatë përplasjes, por janë arrestuar 30 persona. Grupet e krahut të djathtë në Poloni, nuk i mbështesin të drejtat e homoseksualëve dhe kanë bërë dhe marshime kundër tyre në të kaluarën.

Një nga partitë politikë në Poloni, PiS, e trajton fenomenin e LGBT-së si një nga pikat kryesore të fushatës së saj, duke mbështetur ideologjinë se ky është një ndikim i huaj që ka pasoja negative në vlerat tradicionale polake.

“Ne kemi pasur kërcënime me vdekje, e gjithë kjo dhunë ishte për të na detyruar të mos e bënim këtë marshim”, tha për Reuters Bartosz Staszewki, organizatori i marshit të LGBT-së të shtunën.

Shumë parada LGBT-je janë kthyer si ”fusha beteje”, ku policët janë detyruar të mbrojnë marshuesit e paradës, nga njerëzit që përpiqeshin ta ndalonin këtë paradë. 

Ditën e premte, Gjykata e Apelit në Poloni dha lejen për zhvillimin e marshimit të LGBT.

Aktivistët dhe studiuesit polakë shprehen se partia në pushtet ka ideologji homofobike.

Udhëheqësi i PiS, Jaroslaw Kaczynski, u ka kërkuar publikisht polakëve që t’i rezistojnë marshimeve të LGBT-së, të cilat ai i përshkroi si “një kërcënim i vërtetë për shtetin polak”.

Zyrtarët e PiS kanë thënë më parë se nuk janë kundër çifteve gej, ata thjesht duan që ata t’i bëjnë këto gjëra në privatësi. Ata kanë kundërshtuar akuzat e bëra nga aktivistët e LGBT-së, duke thënë se po reagojnë ndaj opinionit publik polak, i cili mbetet konservator për këtë çështje.

Por, si reagon populli polak lidhur me çështjen e LGBT-së?

Sipas një sondazhi të kryer nga një firmë globale IPSOS, lëvizja LGBT konsiderohej nga polakët si një nga kërcënimet më serioze për Poloninë, ndërsa pas kësaj rendisnin ndryshimet klimatike.