“Tym i bardhë” për zgjedhoren, Meta përgëzon palët: Kultura e konsensusit duhet të vazhdojë

Presidenti i Republikës, Ilir Meta, ka përgëzuar konsensusin që palët politike arritën këtë të premte në tryezën e reformës zgjedhore, ku të pranishëm ishin edhe ambasadorët e SHBA, BE dhe ai i Mbretërisë së Bashkuar.

Kreu i shtetit shprehet se ky është një lajm pozitiv, por jo i mjaftueshëm për të garantuar zgjedhje të lira dhe të ndershme. Ai fton palët që këtë frymë pozitive ta dëshmojnë edhe për çështje të tjera, me qëllim afrimin sa më parë të Shqipërisë në familjen europiane.

“Ky është një lajm pozitiv, por jo i mjaftueshëm për të garantuar zgjedhje të lira e të ndershme. Kultura e konsensusit duhet të vazhdojë edhe për kushtet e tjera për të përshpejtuar çeljen e negociatave. Falenderime edhe partnerëve tanë europianë për durimin e tyre!”, shtoi Meta.

Në fund, Meta falënderoi Shtetet e Bashkuara të Amerikës dhe Mbretërinë e Bashkuar, të cilat siç thekson ai, po mbështesin rrugën europiane të vendit tonë.

“Falenderim të veçantë edhe për SHBA dhe Britaninë e Madhe që mbështesin të ardhmen europiane të Shqipërisë!”, thuhet në reagimin e Metës.