Zelenski akuzon Rusinë për bllokimin e 22 milionë tonë ushqimeve

Presidenti ukrainas Volodimir Zelenski ka akuzuar Rusinë për bllokimin e eksportit të 22 milionë tonë produkteve ushqimore dhe paralajmëroi se nëse portet e saj nuk zhbllokohen, shumë vende do të përballen me krizë ushqimore.

“Rusia ka bllokuar pothuajse të gjitha portet dhe mundësitë detare për të eksportuar ushqime: grurin tonë, elbin, luledielli dhe më shumë. Shumë gjëra”, tha ai, sipas deklaratës.

Zelenski paralajmëroi krizë botërore të ushqimeve, pas asaj energjetike që u provokua nga Rusia. Ai e akuzoi Moskën edhe për “vjedhje graduale” të produkteve ushqimore dhe përpjekje për t’i shitur ato.

Para luftës, furnizimet me grurë nga Rusia dhe Ukraina përbënin pothuajse 30% të tregtisë globale. Ukraina është eksportuesi i katërt më i madh në botë i misrit dhe eksportuesi i pestë më i madh i grurit, sipas Departamentit të Shtetit të SHBA.

Programi Botëror i Ushqimit i Kombeve të Bashkuara, i cili ndihmon në luftimin e pasigurisë ushqimore globale, blen rreth gjysmën e grurit të tij nga Ukraina çdo vit dhe ka paralajmëruar për pasoja të rënda nëse portet e Ukrainës nuk hapen.

LEXONI GJITHASHTU:

• Lufta mund të ndalet vetëm përmes diplomacisë, thotë Zelenski
• Zelenski publikon videon ku ndërtesa në Ukrainë shkatërrohet nga raketa ruse