Shqipëria shënon numrin më të lartë të të infektuarve, 36 raste të reja në 24 orë

Ministria e Shëndetësisë lajmëroi me shqetësim përkeqësimin e rasteve me Covid-19 në Shqipëri. Ditën e sotme vendi regjistroi një rekord infektimesh që nga përhapja e pandemisë, 36 persona të prekur nga COVID-19 në 24 orët e fundit, 27 prej të cilëve në Tiranë.

Mjekja Silva Bino nga Instituti i Shëndetit Publik tha se shkak për rritjen e numrit të të prekurve janë bërë grumbullimet masive dhe mosrespektimi i masave. 

“Situata e Covid-19 është përkeqësuar. Kjo situatë nuk ishte kaq e papritshme për shkak të grumbullimeve masive që kanë ndodhur ditët e fundit. Jo vetëm grumbullimet, por edhe mosrespektimi i këshillave, në lidhje me distancimin fizik, në lidhje me mbajtjen e maskave, në lidhje me shumë elementë të tjerë të kujdesit personal qoftë edhe të higjienës,” deklaroi znj. Bino.

[
cite_header=Të gjithë qytetarët të gjithë ne duhet të jemi të përgjegjshëm që Covid-19 nuk ka ikur nga vendi jonë
cite_author=Silva Bino
cite_description=Specialiste e ISHP
]

Në 24 orët e fundit janë testuar 359 persona të cilët janë dyshuar për Covid-19 dhe prej të cilëve kanë rezultuar 27 raste në Tiranë, 4 raste në Shkodër, 2 raste në Kamëz, 1 rast në Durrës, 1 në Lushnje dhe 1 në Lezhë, sipas specialistes.

Përkundër shifrave rekord, të cilat janë regjistruar që nga nisja e pandemisë në Shqipëri, znj. Bino u shpreh se në 24 orët e fundit janë shëruar 15 qytetarë duke çuar numrin total në 960. Aktualisht siç bën me dije Ministria e Shëndetësisë në të gjithë vendin janë 305 raste aktive.