Cakaj vizitë treditore në Luginën e Preshevës për të nxitur bashkimin e partive shqiptare

I ngarkuari me Punët e Jashtme, Gent Cakaj, nisi sot një vizitë treditore në Luginën e Preshevës.

Lajmin e bëri me dije vetë Cakaj përmes një postimi në Facebook, ku tha se kishte kryer takime me përfaqësuesit e partive pjesëmarrëse në Listën e Luginës së Bashkuar.

Në takime, zyrtari i qeverisë shqiptare ka përcjellë frymën e bashkërendimit mes palëve politike atje për të punuar bashkë “për mbrojtjen e lartësimin e të drejtave të shqiptarëve në Luginën e Preshevës”.

“Ne do të ecim bashkë e do të veprojmë të bashkërenduar për të bërë më të mirën për Luginën e shqiptarët në çdo kohë e çdo rrethanë,” – thotë në postimin e tij Cakaj.

Lugina e Preshevës është krahinë në lindje të Kosovës, e cila mbeti nën Serbi pavarësisht përpjekjeve për t’u bashkuar përpara pavarësisë.

Ajo përbëhet nga 3 komuna, Presheva, Bujanoci dhe Medvegja.

Rajoni mendohet të ketë diçka më pak se 35 mijë banorë, rreth 90 për qind e së cilëve janë të etnisë shqiptare. Në rastin e Medvegjës shumica e rezidentëve janë serbë.

Medvegja drejtohet nga Nebojsha Arsiç, i Partisë Progresiste Serbe të Aleksandar Vuçiç, ndërsa Bujanoci dhe Presheva drejtohet nga shqiptarët Shaip Kamberi e Shqipërim Arifi.

Prej rreth një viti, me ndërmjetësim të Tiranës zyrtare, partitë politike në Luginë janë bërë bashkë për të marrë pjesë në zgjedhjet parlamentare të 21 qershorit.

Lexoni gjithashtu:

Spastrimi etnik në Medvegjë, shqiptarët çregjistrohen pa dijeni nga gjendja civile

Spastrim etnik ndaj shqiptarëve, kryekomunari i Preshevës: E kemi denoncuar prej vitesh deri në Bruksel e SHBA, s’na e kanë vënë veshin

Presheva e diskriminuar, kryetari i Luginës flet ekskluzivisht për Euronews Albania