Miratohet leje e re për qarkullimin e automjeteve

Nga e hëna do të nisë të lëshohet leja e re e qarkullimit për automjetet. Leja do të përfshijë dhe certifikatën e pronësisë dhe lejen ndërkombëtare që deri sot ishin dokumente më vete.

Leja e re do të jepet për veprimet e reja me mjetin dhe nuk do të jetë e detyrueshme për qytetarët që kanë lejen aktuale të mjetit.

“Stop orvatjeve dhe me një pagesë ku kostot ulen me 40%, tashmë leja e re e qarkullimit unifikon përfundimisht dokumentet e mjetit në një të vetme”, shkruan kryeministri Rama në Facebook.

Drejtoria e Transportit Rrugor thotë se sot paguhet 3,500 lekë për lejen aktuale, certifikatën e pronësisë dhe lejen ndërkombëtare të mjetit kurse leja e re që unifikon dokumentet e mjetit në 1 do kushtojë 2,100 lekë.

Leja e re nuk do ketë vula kolaudimi, pra nuk bëhet e pavlefshme nga mungesa e vendit për vula si leja aktuale si dhe nuk ka afat skadence.