Protokolli anti-covid, gjobiten 17 biznese për mos respektim të rregullave

Vetëm gjatë ditës së shtunë, Inspektorati Shtetëror Shëndetësor nga kontrolli i 985 bizneseve në të gjithë vendin, ka gjobitur 17 prej tyre për mos respektim të protokollit kundër COVID-19.

Inspektimet në terren nga ISHSH kanë vërejtur se disa subjekte nuk kanë marrë masat mbrojtëse për respektimin e distancimit fizik dhe protokollet e miratuara nga Ministria e Shëndetësisë.

Sipas ISHSH kontrollet do të vijojnë çdo ditë dhe për këtë arsye Ministria e Shëndetësisë u bën apel jo vetëm bizneseve por edhe qytetarëve që të respektojnë rregullat.

“Parandaloni përhapjen e COVID-19 duke respektuar rregullat: Ruani distancën nga njëri tjetri, mbani maska në ambientet e mbyllura ku nuk është e mundur të ruhet distanca, ruani higjienën personale, bizneset dhe institucionet të zbatojnë protokollet e sigurisë dhe mbroni veten dhe të tjetër në mënyrë që të kufizojmë sa më shumë që të jetë e mundur përhapjen e COVID19”, bën apel Ministria e Shëndetësisë.