Franca shënon ‘fitoren e parë’ kundër COVID-19, Macron: I gjithë vendi zonë e gjelbër

Presidenti francez, Emmanuel Macron fazën e parë të pandemisë e cilësoi fitoren e parë kundër COVID-19 duke premtuar se vendi ka mësuar nga kriza shëndetësore dhe ekonomike.

Në një dalje publike drejtuar kombit francez, shefi i Elizesë bëri me dije se i gjithë territori francez është tashmë zonë e gjelbër ku mund të lëvizet lirshëm.

Megjithatë, presidenti francez theksoi se virusi ende nuk është zhdukur dhe do të duhet të ruhet distanca sociale për një kohë të gjatë.

Kufijtë e vendit me vendet e tjera anëtare të Bashkimit Evropian rihapen nga kjo e hënë, ndërsa  kufijtë me vendet jashtë bllokut “ku epidemia është nën kontroll” rihapen më 1 korrik. Për liderin francez, përparësi do të jetë “rindërtimi i një ekonomie të fortë, ekologjike, sovrane”.

BE do të ketë gjithashtu rolin e saj për të rimëkëmbur ekonominë, vazhdoi Macron, duke thënë se blloku, pas një fillimi të vështirë, e rigjeti forcën të ringrihet.

Ai e përshkroi propozimin franko-gjerman për të financuar një fond të rimëkëmbjes si një hap të rëndësishëm në aventurën evropiane dhe konsolidimin e një Evrope të pavarur e cila forcon identitetin, kulturën e saj, kundër Kinës, Shteteve të Bashkuara dhe rendit botëror.