Dialogu me Serbinë, përfaqësuesi i BE-së Miroslav Lajčák shkon sot në Kosovë

Përfaqësuesi i Posaçëm i Bashkimit Evropian, për dialogun Kosovë-Serbi, Miroslav Lajčák do të vizitojë Kosovën ditën e sotme, ndërsa do të qëndrojë deri më 18 qershor.

Kështu bënë të ditur zyra e BE-së në Prishtinë, por nuk jepen detaje për orën dhe agjendën e takimeve të tij.

Thuhet në mënyrë të përgjithësuar që ai do të takojë udhëheqësit politik, përfaqësuesit e partive politike dhe të komunitetit ndërkombëtar në Kosovë, si dhe krerët e misioneve të vendeve anëtare të BE-së.

“Përfaqësuesi i Posaçëm i BE-së planifikon të diskutojë kushtet dhe modalitetet për një rifillim të shpejtë të dialogut të lehtësuar nga BE-ja mes Prishtinës dhe Beogradit”, thuhet në njoftim.

Për të folur për dialogun dhe koordinimin institucional sot janë takuar Presidenti Hashim Thaçi dhe Kryeministri Avdullah Hoti.