Protokolli i sigurisë në transportin ajror, çfarë duhet të dinë pasagjerët

Nga dita e hënë, kanë rifilluar fluturimet me 3 shtete nga Aeroporti Ndërkombëtar i Rinasit, me Athinën, Vjenën dhe Beogradin.

Në ditët në vijim, pritet të rifillojnë edhe linjat ajrore me Italinë, ndërkohë që për të gjithë qytetarët që planifikojnë të udhëtojnë jashtë, duhet të jenë të informuar se çfarë parashikon protokolli i sigurisë për transportin ajror. 

Autoriteti i Aviacionit Civil do të mbikëqyrë zbatimin e këtij protokolli nga Enti Menaxhues i Aeroportit dhe operatorët ajrorë që fluturojnë për dhe nga Shqipëria, si dhe do të koordinojë me Institutin e Shëndetit Publik dhe Inspektoratin Shtetëror Shëndetësor për të lehtësuar zbatimin e këtyre masave.

Disa prej masave konsistojnë në respektimin e 1,5 metrave distancë nga njëri-tjetri, përdorimi i detyrueshëm i maskës, teksa pasagjerët që nuk zbatojnë masat parandaluese nuk do t’u jepet akses në ndërtesën e terminalit të aeroportit, në kabinë ose do të zbriten edhe nga avioni.

Pasagjerët që shfaqin simptoma nuk do të lejohen të udhëtojnë, ndërsa masa të rrepta parashikohet edhe për ekuipazhin e avionit.

Shef i kabinetit të drejtorit ekzekutiv në Autoritetin e Aviacionit Civil, Feliks Baci tha në Euronews Albania se udhëtimet e pasagjerëve do të bëhen sipas një protokolli strikt.

“Çdo udhëtar që pret biletën ai duhet të njihet me rregullat e hyrjes në një shtet apo në një tjetër. Çdo shtet ka paqartësi. Çdo udhëtar është përgjegjës për vendin së ku do udhëtojë. Rregullat janë strikte, që nga vënia e këmbës brenda aeroportit, gjatë hipjes në avion dhe deri në arritjen në destinacion. Çdo aktor ka rregullat ë përcaktuar. Udhëtarët do ndeshen më një staf të trajnuar’, tha ai.

Më tej z. Baci shtoi se Shqipëria i ka dhënë prioritet fluturimeve “charter” për t’i ardhur në ndihmë sektorit të turizmit.

“Qasja që ne kemi në nivel ministerial është që t’u japim prioritet fluturimeve charter. Kjo për t’i shërbyer zinxhirit të nevojave ekonomike dhe turizmit. Fluturimet charter zunë një prioritet në krahasim më fluturimet e programuara”, shtoi ai.