Kontrolle në Kapshticë, Policia sekuestron 32 mijë euro të padeklaruara

Policia Kufitare në Kapshticë ka bërë të mundur parandalimin e transfertës së paligjshme të parave jashtë vendit.

Gjatë kontrolleve të kryera, autoritetet doganore zbuluan një shumë prej 32 mijë eurosh, të cilat nuk ishin deklaruar nga poseduesi i tyre.

“Shërbimet e Policisë Kufitare të Kapshticës, në bashkëpunim e koordinim të veprimeve me shërbimet doganore dhe ato të DVP Korçë, në vijim të punës për parandalimin, evidentimin dhe goditjen e paligjshmërisë, në sajë të forcimit të kontrolleve, kanë evidentuar dhe goditur një rast të transfertave të parave në mënyrë të paligjshme jashtë vendit”, njofton policia.

Policia ka vënë në pranga një 50-vjeçar, ndërsa kanë nisur hetimet për zbardhjen e rastit.

“Pas analizës së riskut të bërë nga shërbimet e Policisë Kufitare, gjatë kontrollit të ushtruar në vijën e dytë, shtetasit V. M., 50 vjeç, i cili u paraqit në dalje të Republikës së Shqipërisë si këmbësor, iu gjetën në çantën personale 32.000 euro të padeklaruara nga ana e tij, të cilat iu sekuestruan në cilësinë e provës materiale”, sqaron policia.