Avokatët në Korçë bojkotojnë edhe seancat për masat e sigurisë

Kryetari i Dhomës së Avokatisë në Korçë, Arben Lena deklaroi se është marrë një vendim për bojkotimin e seancave për masat e sigurisë, në datat 24 dhe 25 qershor.

Vendimi u mor këtë të mërkurë, teksa në mbledhje e avokatëve të Korçës ishte i pranishëm edhe Kreu i Dhomës Kombëtare të Avokatisë, Maks Haxhia.

Lena bëri me dije se në lidhje me këtë vendim, janë njoftuar autoritetet përkatëse dhe shtoi se janë të gatshëm që të përballen me pasojat.

Ndërsa, Maks Haxhia pohoi se qëndrimi i Dhomave të Avokatisë është në unitet dhe nuk është e vërtetë që ka përçarje.

Prej 8 ditësh, avokatët e Korçës kanë bojkotuar qindra seanca duke shkaktuar krizë në sistemin e drejtësisë, për shkak se janë shprehur kundër hartës së re gjyqësore.

Harta e re gjyqësore ka sjellë debate e kundërshti. Ajo parashikon në total 13 gjykata të shkallës së parë, 2 gjykatë administrative dhe shkrirjen e gjykatave të apelit në një të vetme. Avokatët i kërkojnë qeverisë të mos e miratojë këtë skemë.

LEXONI GJITHASHTU

• Bojkoti i avokatëve të Korçës, pjesëmarrje vetëm për masa sigurie
• Avokatët zgjasin bojkotin, Shkodër: Gati për grevë urie
• Avokatët në grevë për 4 ditë, kundërshtojnë hartën e re gjyqësore