Kriza globale e ushqimit, ministrat e G7 mblidhen në Berlin

Gjetja e zgjidhjeve urgjente për shpërthimin e krizës globale të ushqimit, shkaktuar kryesisht nga lufta në Ukrainë është qëllimi kryesor i takimit të ministrave të G7 në Berlin. 

Shumë zona të Afrikës janë prekur nga reduktimi i ushqimeve, çka është përkeqësuar nga konflikti i fundit.

“Është një krizë urie që po afrohet si një valë kërcënuese për jetën. Disa nga arsyet nuk janë të reja: konfliktet rajonale, veçanërisht në Afganistan, sundimi i talebanëve, thatësirat, pasojat e krizës klimatike dhe gjithashtu pasojat e Covid-19, por ishte lufta e agresionit të Rusisë kundër Ukrainës që e ktheu këtë valë në një cunami”, u shpreh Annalena Baerbock, ministrja gjermane e Punëve të Jashtme.

Për shkak të bllokimit, vendet afrikane janë ato që po e përjetojnë më shumë krizën.

Ministrat do të diskutojnë se si të zhbllokojnë drithin ukrainas, i cili aktualisht është i bllokuar në magazina.

Zyrtarët e lartë mbështesin përpjekjet e Kombeve të Bashkuara për të negociuar hapjen e porteve të Ukrainës për të lejuar eksportet e grurit.

LEXONI GJITHASHTU

• Kriza e çmimeve, tek ne u shtrenjtua nafta e ushqimet, në Europë energjia
• Lufta në Ukrainë, ndikim në çmimet e energjisë dhe ushqimeve në mbarë globin