Pekin, frikë nga vala e dytë. Izolohet qyteti, mbyllen shkollat dhe anulohen fluturimet

Disa mijëra persona u vendosën në radhë të mërkurën në zona të ndryshme të Pekinit për t’u testuar nga koronavirusi, pasi qyteti shpalli masat e reja për të frenuar një valë të dytë epidemie.

Qytetarët u mblodhën jashtë qendrave të testimit të ngritura në parqe, qendra sportive dhe spitale.

Ndërkohë, lagje të shumta të kryeqytetit janë izoluar pasi disa raste infektimi u verifikuan mes rezidentëve. Shumë banorë druhen se një bllokadë e tipit të Wuhanit, vatra e valës së parë të COVID, është e pashmangshme.

Po të mërkurën, kopshtet, shkollat fillore dhe ato të mesme u mbyllën në mbarë Pekinin.

Gjithashtu, shërbimet taksi, të autobusëve dhe shumë fluturime të brendshme nga dy aeroportet e qytetit u anuluan.

Masat u morën pasi ditën e martë autoritetet regjistruan 31 raste të reja infektimi, një shifër e konsideruar e lartë që nga rënia e pikut.

Po të martën zyrtarët kinezë rritën nivelin e alarmit në kuotën 2, e dyta më e lartë në një sistem me 4 nivele.