Kapet një arsenal armësh në Yrshek të Tiranës, dyshimet e policisë

Hetimi për sulmin me armë ndaj një kompleksi të boshatisur në rrugën dytësore Tiranë-Vorë e çoi policinë në bazën e një grupi kriminal.  Në fshatin Yrshek në një banesë 1 katëshe , efektivët e komisariatit nr. 6 zbuluan një arsenal të tërë armësh.

Pronari i saj Gëzim Haroku i cili qëlloi me breshëri automatiku mbi kompleksin u vu në pranga ndërsa në kërkim u shpall bashkëpunëtori i tij Erigres Mihasi. Ata dyshohet se janë anëtarë të një bande të njohur kriminale që vepron në Tiranë.

Mihasi ka qenë i skeduar edhe më parë nga policia dhe njihet si person i afërt i Santiago Malkos, ish-policit të ekzekutuar gushtin e 2019-ës në kryeqytet. 

Në banesën një katëshe në Yrshek policia sekuestroi 15 armë zjarri mes tyre edhe 2 automatikë mp7, granata dhe tritol si dhe dy motorë sportivë dhe një automjet që dyshohet se janë përdorur edhe në ngjarje të tjera kriminale.