Kreu i Listës Serbe në Kosovë fton elektoratin të votojë partinë e Vuçiç

Zgjedhjet parlamentare të Serbisë po mbahen edhe në Kosovë, nën mbikëqyrjen e Organizatës për Siguri dhe Bashkëpunim në Evropë (OSCE).

Me dhe pa masa mbrojtëse ndaj COVID-19, mijëra serbë të Kosovës i janë përgjigjur thirrjes për të votuar.

Në Mitrovicën e Veriut ka votuar edhe zëvendëskryeministri i Kosovës dhe kryetari i Listës Serbe, Goran Rakiç, i cili ka ftuar qytetarët serbë të dalin sa më masisvisht në zgjedhje.

 “Kjo dalje masive që nga mëngjesi i hershëm, është tregues se dita e sotme, është ditë e demokracisë, dhe thërras të gjithë njerëzit, të gjithë qytetarët, që të dalin në zgjedhje në mënyrë masive dhe të votojnë për kandidatët e tyre sepse kjo është mënyra që të ruhemi dhe të mbijetojmë në këto hapësira, natyrisht duke respektuar të gjitha masat dhe rekomandimet të cilat i rekomandojnë organet kompetente në luftë kundër COVID-19”, tha ai.

Rakiç bëri thirrje të votohet partia e presidentit serb, Aleksandar Vuçiç.

“Vende të reja të punës, rrugë të reja, shkolla të reja, spitale të reja, përkrahja për të rinjtë, përkrahja për të moshuarit, tregon se sot duhet të dalim në numër sa më të madh, t’i votojmë kandidatët e preferuar. Thërras anëtarët e mi, simpatizantët, që të votojnë më të mirët, të votojnë numrin 1, Partinë Përparimtare Serbe-SPS”, u shpreh Rakiç.

Derisa Qeveria e Kosovës është pajtuar me mbajtjen e zgjedhjeve parlamentare të Serbisë në Kosovë, Lëvizja Vetëvendosje e ka cilësuar këtë veprim si lejim të cenimit të integritetit dhe sovranitetit të shtetit. Ndërkohë, zyra e OSBE në Kosovë e ka vlerësuar si normale mbajtjen e zgjedhjeve serbe në Kosovë.