Skandal mjedisor në Velipojë, mbetjet nga prishjet e IKMT hidhen pranë hidrovorit në Lagunën e Vilunit

Inspektorati Kombëtar i Mbrojtjes së Territorit ka zbarkuar sërish në Velipojë këtë të martë, por kësaj here jo për të prishur objekte pa leje, por për të pastruar mbetjet e lëna nga aksioni dy ditor i mbajtur disa ditë më parë në plazhin e Velipojës.

Por, pavarësisht iniciativës për të pastruar të gjithë brezin ranor nga mbetjet e lëna nga aksioni, një skandal mjedisor, po bëhet pikërisht nga dora e shtetit.

Mjetet e tonazhit të rëndë, pasi marrin objektet dhe mbetjet inerte nga hapësira ranore e plazhit, po i hedhin mbetjet në pranë hidrovorit në Lagunën e Vilunit.

Pa pyetur askënd, IKMT-ja po depoziton mbetjet inerte në një nga zonat me të bukura të Velipojës, e aq me tepër pranë hidrovorit, i cili është një objekt i rëndësisë së veçantë.

Pamjet e siguruara tregojnë këtë masakër mjedisore, kur kujtojmë që në territorin e qarkut të Shkodrës është i vendosur edhe një landfill për depozitimin e mbetjeve.