Kryeinfektologu amerikan: Javët e ardhshme, kritike për frenimin e valës së COVID-19

Javët e ardhshme do të jenë kritike në përpjekjet për të zvogëluar numrin e rasteve me coronavirus, tha Dr. Anthony Fauci para Kongresit Amerikan të martën.

Shefi i sëmundjes infektive amerikane u zotua se numri i testimeve do të rritet.

“Tanimë javët në vijim do të jenë kritike në aftësinë tonë për të adresuar vatrat e reja  që ne po shohim në Florida, Teksas,  Arizona dhe në shtetet e tjera. Ata nuk janë të vetmet që kanë vështirësi.

Në dijeninë  time, askujt prej nesh nuk  i është  thënë që të ngadalësojë  procesin e testimeve. Ky është thjesht një fakt. Në realitet , ne do të bëjmë më shumë testime”, tha dr. Fauci.

Të martën pati rritje të numrit të infeksioneve në disa shtete të SHBA-së, si Arizona, California, Mississippi, Nevada dhe Texas duke vendosur rekorde të reja ditore për raste të reja të coronavirusit.

Drejtuesit e lartë të shëndetit publik hodhën poshtë pretendimet e Trump se pandemia është duke u “venitur”.

120 mijë persona kanë humbur jetën deri tani nga COVID-19 në SHBA, ndërsa rastet ditore kanë shkuar në 30 mijë, nga 20 mijë që ishin më parë.