Ideja e biznesmenit belg, maskat antivirus me buzëqeshje

Para faktit se maskat antivirus po kthehen në një objekt për përdorim të përditshëm, një biznesmen belg ka vendosur t’i pajisë ato me fytyrën e njeriut.

Duke përdorur një makinë fotosh të lëvizshme, një software dhe një aplikacion telefoni, Charles de Bellefroid prodhon maska me pjesën e poshtme të fytyrës të printuar në to.

“Kjo u jep mundësinë njerëzve të veshin një maskë përmes të cilës të përcjellin emocionet e tyre pozitive dhe njëkohësisht të njihen përballë të tjerëve. Projekti lindi nga fakti se me COVID-19, kompania ime nuk prodhonte më të ardhura. Sikurse e dini dhe ju, nuk ka pasur evente dhe na u desh të dilnim me një ide të re e të bukur”, shprehet Charles de Bellefroid, themelues i “Smiling Mask”.

Kompania vepron në vende publike si për shembull supermarketet, ku klientët mund të marrin maskën e tyre të sapoprintuar dhe gjithashtu zhvillon një aplikacion përmes të cilit kushdo mund të ketë buzëqeshjen në maskë.

Pasi bëjnë porosinë, klientët marrin një link për aplikacionin që i lejon të fotografojnë vetveten dhe ta dërgojnë foton në website-n e firmës.

Maska, me pjesën e poshtme të fytyrës të stampuar në të, shkon tek porositësit me postë brenda pak ditësh. Ajo kushton rreth 20 euro dhe mund të lahet 8 deri në 10 herë.