Foni: 300 mijë udhëtarë në ditë pa transport publik në Tiranë, operatorit t’i hiqet përgjegjësia e distancimit fizik

Ditën e djeshme transporti ndërqytetas nisi sërish pas afro 4 muajsh ndërprerje, ndërsa transporti urban ende nuk ka rifilluar punën.

Shoferet tregojnë se numri i pasagjerëve sot ishte i ulët dhe se duhet ndihma e shtetit për të kompensuar humbjet e transportit publik i cili me shume se tre muaj qëndroi i mbyllur.

Transporti urban dhe interurban në vend nuk do të nisë shërbimin, deri në ndryshimin e protokollit të sigurisë të udhëtimit dhe plotësimin e katër kërkesave financiare, që nga ulja e TVSH-së dhe heqja e akcizës të naftës.

Përfaqësues i Shoqatave të Transportit Ndërqytetas, Konstandin Foni tha për Euronews Albania se transporti brenda Tiranës nuk ka nisur ende, pasi operatorët përballen me vështirësi financiare që ua pamundëson këtë aktivitet.

Pasi e cilësoi të pazbatueshëm protokollin e propozuar nga ministria për linjat e transportit urban, z. Foni kërkoi që përgjegjësia për ruajtjen e distancimit fizik të mos i lihet operatorit, i cili sipas tij mund të penalizohet pa të drejtë për këtë, por vetë qytetarit.

“Protokolli është i pazbatueshëm, qytetarët duhet të mbajnë distancë 1 metër për të cilën është përgjegjës operatori, gjë që është e parealizueshme.

Gjoba për operatorët është nga 1-7 mln lekë. Në një autobus standard në distancë 1 m do udhëtojnë 25 për qind e qytetarëve. Edhe në rastin e transportit ndërqytetas, sipas protokollit mund të udhëtojnë 50 për qind e kapacitetit. 

Kërkojmë të hiqet përgjegjësia e diastancimit fizik nga operatori dhe t’i lihet qytetarit”, tha ai.