Vladimir Putin pret zgjatjen e mandatit përtej 2030-s, qytetarët të ndarë

Në qendrat e votimit në Moskë mund të shohësh radhë njerëzish. Ata po presin, po ruajnë distancimin social sipas shenjave të vendosura në tokë dhe kur një grup votuesish del, qendra e votimit dezinfektohet.

Votimi do të zgjasë deri të mërkurën, më 1 korrik, e shpallur nga Presidenti Putin festë kombëtare për të mundësuar votimin.

“Deri tani, çdo gjë që është bërë nga autoritetet dhe Putin na ka ndihmuar. Cili vend tjetër do t’i lejonte njerëzit të mos punonin për të shpëtuar shëndetin e tyre?”, shprehet një qytetare.

“Ne duam të besojmë në një të ardhme të ndritur, ku fëmijët tanë të jenë të mbrojtur e ku ka stabilitet. Votimi është i rëndësishëm sepse është në lojë e ardhmja e Rusisë”, thotë një tjetër qytetar.

Qytetarët që kanë votuar nuk kanë qenë të paktë. Por ka dhe nga ata që kundërshtojnë procesin.

“Jam kundër votimit njëherësh të amendamenteve. Ne duhet të vendosim për to në mënyrë të veçantë. Mbi të gjitha nuk jam dakord me mandatin e pafund të Putin, si dhe për faktin se gjykatat ruse nuk marrin parasysh vendimet e gjykatave evropiane”, tha një qytetare.

Në Moskë dhe disa lokalitete të tjera është vënë në dispozicion edhe votimi online, për të reduktuar rrezikun e infektimit. Por për opozitën, vota elektronike është vetëm një mashtrim për të falsifikuar rezultatin e referendumit.