Meta kërkon takim me Ruçin, Presidenti: Akuzat ndaj Thaçit, strategji për të njollosur UÇK-në

Pas përkthimit të draftit të Komisionit të Venecias Presidenti Meta i ka kërkuar takim kryeparlamentarit Ruçi për çështjen e Gjykatës Kushtetuese. Kështu u shpreh kreu i shtetit në konferencën e tij, tashmë të përjavshëm.

“Sot i kemi përcjellë shkresën zyrtare Kryetarit të  Kuvendit për të zhvilluar një takim sa më parë që ai të ketë mundësi duke filluar nga e hëna që vjen”, tha kreu i shtetit.

Presidenti Meta ka komentuar edhe mbi ngritjen e aktakuzës për homologun e tij Thaçi dhe Kadri Veselin. Ai i cilësoi këto akuza si strategji provokative për të njollosur luftën e UÇK-së, ndërsa u shpreh i bindur se Thaçi dhe Veseli do të përballojnë me sukses e përgjegjshmëri çdo akuzë.

“Nuk është herë a parë që ndaj udhëheqësve ndaj UÇK-së kemi aktakuza, të gjithë tashmë kemi eksperiencën e këtyre 20 viteve, ku pala e humbur, që shkaktoi luftën, gjenocidin e ka kthyer në një strategji të sajën, njollosjen e UÇK-së por jo thjesht vetëm kaq por dhe dëmtimin e funksionimit të shtetit të Kosovës”, tha Meta.

I pyetur për projektligjin e ri për minoritetet që po hartohet nga qeveria, Meta u shpreh se është duke studiuar në brendësi këtë çështje, e cila ka pasur reagim edhe nga shumë akademikë, dhe më pas do të mbajë një qëndrim.