Deputetët gjermanë Beyer dhe Schmidt: Po tentohet të hidhet baltë ndaj Gjykatës Speciale, nuk i është vënë pas UÇK-së

“Zhvillimet e fundit në Republikën e Kosovës, për sa i përket aktakuzës për presidentin Thaçi po ndiqen nga afër në Gjermani dhe komuniteti ndërkombëtar”, kështu janë shprehur  Peter Beyer dhe Christian Schmidt, deputetë në Bundestag.

Më tej ata kanë theksuar se është e rëndësishme “të vihen në dukje se Dhomat Speciale janë pjesë përbërëse e vetë Gjyqësorit të Kosovës, është krijuar nga vetë Kosova.

Dhomat Speciale janë ngritur për të ndjekur krimet e luftës dhe krimet kundër njerëzimit të kryera nga individë gjatë luftës.

Ata kanë mohuar se këtu nuk bëhet fjalë për luftën e pavarësisë të UÇK-së dhe i kanë cilësuar këto deklarata si “dezinformim i qëllimshëm”.

“E dimë se disa faktorë në Kosovë përpiqen të përhapin propaganda të rreme sikur komuniteti ndërkombëtar në përgjithësi dhe zyra e Prokurorit Special në veçanti janë një forcë e huaj që i janë vënë pas UÇK-së. Kjo nuk është e vërtetë dhe asgjë tjetër përveçse dezinformim i qëllimshëm”.

“Rehabilitimi i të shkuarës së një kombi, veçanërisht për krime të mundshme lufte dhe kundër njerëzimit, është çelësi kryesor i pajtimit. E vërteta dhe vërtetësia kërkohen me ngulm nga qytetarët e Kosovës. Ata po presin nga liderët politikanë, e po ashtu edhe Gjermani dhe Bashkimi Europian”.

Peter Beyer dhe Christian Schmidt janë anëtarë të Bundestagut gjerman dhe raportuesit e Ballkanit Perëndimor në Komisionin e Punëve të Jashtme. Beyer është anëtar i Bashkimit Kristian Demokrat (CDU) ndërsa Schmidt është anëtar i Bashkimit Kristian Socialist (CSU në Bundestag.