Rindërtimi pas tërmetit, Edi Rama: Janë hapur 33 kantiere, puna vijon edhe në korrik

Kur kanë kaluar 7 muaj nga tërmeti i 26 nëntorit kryeministri Edi Rama thotë se aktualisht po punohet në 33 kantiere të hapura me programin e rindërtimit.

Puna është fokusuar tek rindërtimi i shkollave dhe është hapur kantieri i parë i rindërtimit të lagjeve në zonën e Fushë-Krujës. Numri një i qeverisë thotë se javën dhe gjatë gjithë korrikut do të fillojë rindërtimi i banesave individuale.

“Sot punohet në 33 kantiere shkollash të reja në zonat e prekura nga tërmeti dhe në kantierin e parë të lagjeve të reja të banimit (Fushë-Krujë), ku po ndërtohet infrastruktura nëntokësore. Javën e ardhshme e gjatë gjithë korrikut do të vijojë hapja e kantiereve të reja dhe do të nisë pak nga pak edhe ndërtimi i banesave individuale”, shkroi Rama. 

Gjithashtu kryeministri njoftoi se ka nisur asfaltimi i by pass-it të Vlorës, i cili pritet të jetë një lehtësi mjaft e madhe për pushuesit duke qenë se pak ditë më parë përfundoi edhe bypass-i i Fierit.