Lija e majmunëve, OBSH: Të vaksinohen personat me rrezik të lartë ekspozimi

Organizata Botërore e Shëndetësisë po rekomandon vaksinime të targetuara në vend që të organizojë një program masiv në luftën për të kontrolluar virusin e lisë së majmunëve.

Sipas saj, personat me rrezik të lartë ekspozimi, duke përfshirë punonjësit shëndetësorë dhe ata me partnerë të shumtë seksualë duhet të vaksinohen.

“Ky është një shpërthim që mund të ndalet, nëse vendet, komunitetet dhe individët informohen, i marrin seriozisht rreziqet dhe hapat e nevojshëm për të ndaluar transmetimin dhe për të mbrojtur grupet e cenueshme, u shpreh kreu i OBSH-së, Tedros Adhanom Ghebreyesus.

Për momentin një vaksinë kundër lisë së majmunit, e quajtur MVA-BN, është miratuar në Kanada, Bashkimin Evropian dhe SHBA. Dy vaksina të tjera janë duke u shqyrtuar.

Megjithatë, ka mungesë të të dhënave për efektivitetin ose sa doza mund të nevojiten.

Rreth 98 për qind e rasteve të raportuara të prekur me linë e majmunit janë burra që kanë kontakte seksuale me shumë burra të tjerë.

OBSH po rekomandon reduktimin e numrit të partnerëve seksualë dhe shkëmbimin e detajeve të kontaktit me çdo partner të ri për të mundësuar ndjekjen nëse është e nevojshme.

Megjithatë, çdokush mund të infektohet përmes kontaktit të ngushtë mes njerëzve, si përqafimi, puthja, si dhe në peshqirë të kontaminuar.

Në 78 shtete raportohet për më shumë se 18 mijë të infektuar ku 70% janë në vendet evropiane.

LEXONI GJITHASHTU

• Mbi 18 mijë raste me linë e majmunëve në botë, thotë OBSH-ja
• Emergjencë globale, OBSH-ja jep alarmin për linë e majmunëve