Mesazhi i Biden dhe ‘shënjestrat’ e Ramës | 5 ngjarjet kryesore

• ‘Së bashku drejt së ardhmes’, Presidenti Biden mesazh shqiptarëve

Presidenti amerikan, Joe Biden ka dhënë një mesazh me rastin e 100-vjetorit të vendosjes së marrëdhënieve diplomatike midis Shqipërisë dhe Shteteve të Bashkuara të Amerikës.

Gjatë një aktiviteti të mbajtur në Tiranë, ambasadorja amerikane Yuri Kim ka përcjellë video mesazhin e Biden, ku ai ka theksuar se SHBA-të do të vijojnë të mbështesin Shqipërinë në të ardhmen, për të luftuar korrupsionin dhe në rrugën drejt BE-së.

• “E keqja shfaqet para nesh”, Rama shënjestron Metën dhe Berishën

Kryeministri Edi Rama edhe në takimin e mbajtur në 100-vjetorin e marrëdhënieve Shqipëri-SHBA, shënjestroi kreun e Partisë së Lirisë Ilir Meta dhe kreun e PD-së, Sali Berisha. Rama nënvizoi se e keqja dhe e shkuara, rishfaqet edhe sot në forma të ndryshme.  Ai nënvizoi se po kërkohet të bëhet rezistencë ndaj ndryshimit dhe krijimit të kushteve për drejtësi për të gjithë.

• Yuri Kim: Besimi i SHBA-ve të Shqipëria nuk është lëkundur

Në aktivitetin e mbajtur në Tiranë me rastin e 100-vjetorit të vendosjes së marrëdhënieve diplomatike mes dy vendeve, ambasadorja amerikane Yuri Kim tha se besimi i Shteteve të Bashkuara te Shqipëria nuk është lëkundur. Gjatë fjalës së saj, Kim u shpreh se SHBA-të ishin krenarë për Shqipërinë kur ra diktatura komuniste, si dhe për procesin e integrimit, me anëtarësimin në NATO dhe hapjen e negociatave me Bashkimin Evropian.

• Ndryshime në kupolën e Policisë së Shtetit

Drejtori i Përgjithshëm i Policisë së Shtetit, Gledis Nano ka bërë ndryshime në kupolën drejtuese të këtij institucioni. Tonin Vocaj është emëruar zëvendës Drejtor i Përgjithshëm i Policisë së Shtetit, duke u larguar nga posti i Drejtorit të Departamentit të Policisë Kriminale. Në këtë post, tanimë do të jetë drejtor Neritan Nallbati, i cili kishte mbajtur detyrën e Drejtorit të Policisë së Durrësit.

• Fluks në QSUT, qytetarët paraqiten me temperaturë të lartë dhe dhimbje koke

Temperaturat e larta të këtyre ditëve kanë shtuar numrin e qytetarëve që paraqiten në urgjencë në dy spitalet kryesore, pranë qendrës spitalore Universitare “Nënë Tereza” si dhe në spitalin e Traumës. Ngarkese jo të vogël përballojnë edhe qendrat shëndetësore.