Serbia nuk ka kërkuar ndihmën e Rusisë për tensionet në Kosovë, thotë Moska

Zëdhënësja e Ministrisë së Jashtme ruse, Maria Zakharova deklaroi këtë të martë se Serbia nuk i është drejtuar Rusisë me kërkesë për ndihmë, në lidhje me tensionet në veri të Kosovës.

Duke iu përgjigjur pyetjes së një gazetari nëse Beogradi kërkoi ndihmën e Rusisë për zgjidhjen e situatës me Kosovën, ajo u përgjigj: “Jo, nuk e bënë”, shkruan agjencia ruse e lajmeve, Tass.

Zakharova tha gjithashtu se Rusia po i bën thirrje Perëndimit që të ndalojë diskriminimin e serbëve në Kosovë.

“I bëjmë thirrje BE-së dhe SHBA-së që të përmbahen nga inkurajimi i ekstremistëve në Prishtinë në çmendurinë e tyre antiserbe dhe të ndalojnë provokimet kundër serbëve të Kosovës”, tha Zakharova.

Pikat kufitare Jarinje dhe Bërnjak në veri të Kosovës, prej ditës së djeshme janë të hapura për qytetarët dhe liria e lëvizjes është e plotë, pas heqjes së barrikadave të vendosura nga serbët lokalë.

Qeveria e Kosovës tha se do të shtyjë zbatimin e vendimeve për lëshimin e dokumenteve për hyrje-dalje për shtetasit e Serbisë që hyjnë në Kosovë dhe atë për ndryshimin e targave serbe, duke filluar më 1 shtator.

LEXONI GJITHASHTU

• Osmani: Serbia kontrollohet nga Rusia, Putin s’do arrijë të destabilizojë Ballkanin

• Reciprociteti ndër vite, 6 masat që Kosova i vendosi Serbisë që nga viti 2011

• Kurti të dorëhiqet pasi shkeli vendimin për reciprocitetin, thotë Baton Haxhiu