Itali, kapet amfetamina e ISIS me vlerë 1 miliard euro

Italia ka kapur sasinë më të madhe të amfetaminës në histori, sipas policisë vendase.  

Bëhet fjalë për 14 tonë, të prodhuar nga ISIS në Siri, me vlerë rreth 1 miliard euro.

Amfetamina ishte e ndarë në 84 milionë tableta, sipas njoftimi të policisë italiane, dhe ishte kapur në tre kontejnerë të ndryshëm në portin e Salernos, Napoli, të fshehura në cilindra prej letre.

Tabletat ishin shënuar me logon “Captagon”, e cila i përket një marke ilaçi që në vitet ’90 përdorej gjerësisht në Lindjen e Mesme si qetësues dhimbjesh.

DEA, Agjencia Amerikane kundër Drogës, ka konfirmuar që kjo logo është përdorur gjerësisht nga ISIS.

Policia thotë se kjo drogë është përdorur nga luftëtarët e ISIS si për të shmangur frikën dhe dhimbjen. Madje, mori nofkën “droga xhihadiste” dhe u përdor gjatë sulmeve të Bataklanit, në Paris, në vitin 2015.

Të ardhurat e kësaj droge janë përdorur për të financuar sulmet terroriste të ISIS, pasi mundëson prodhimin në masë.

Hetuesit thanë se sasia e kapur ka gjasa të jetë e shumë grupeve kriminale, të cilët kanë bashkëpunuar, pasi asnjë trafikant droge nuk mund të përballojë një blerje të vetme prej 1 miliardë eurosh.

Agjencia italiane e lajmeve, ANSA, tha se droga mendohet të ketë lidhje me Kamorrën e Napolit, të cilët kanë pasur si synim ta nxjerrin në tregun ndërkombëtar.

Gjasat janë që kufizimet e udhëtimeve, për shkak të coronavirusit, mund të kenë bllokuar shpërndarjen e drogës nëpër Europë, ndaj trafikantët janë kthyer në Siri.