Të pasigurtë në plazh, pushuesit në Golem frikë për fëmijët pas tragjedisë në Himarë

Një ditë pas tragjedisë në Himarë ku humbi jetën 7-vjeçarja, në plazhin e Golemit prindër e gjyshër bëjnë roje për më të vegjlit e familjes.

Frika nga ajo që ndodhi në plazhin e Potamit i shtyn ata të vëzhgojnë fëmijët teksa lahen në det.

“I ruajmë vetë, ç’të bëjmë kështu është. Me fëmijët duhet të jemi të kujdesshëm, sepse janë fëmijë, duan kujdesin e duhur. Pavarësisht sesi është shërbimi e siguria, nuk besoj se mund t’i përmbushin të gjitha në atë masë që i duam ne”, shprehen ata.

Edhe pse mjetet lundrojnë larg bregut dhe në një korridor të veçantë, pushuesit janë të frikësuar.

“Ku e dimë ne a është i përgatitur apo jo skafisti? S’ka siguri. Vetëm i madhi lart. Çfarë t’i them qeverisë unë? S’duhet të ndodhte fare kjo, tani që ndodhi çdo gjë është”, sipas tyre.

Por pavarësisht thirrjeve të shpeshta të qytetarëve për largimin e tyre, sportet e ujit me mjete lundruese po lulëzojnë çdo vit e më shumë.

Megjithë trendin në rritje, Golemi nuk ka regjistruar asnjë incident apo tragjedi me mjetet e ujit.

“Çelësin” e suksesit e tregon për “Euronews Albania” Xhuljan Zuna, menaxher i një kompanie që jep mjete lundruese.

“Kemi rregulloren tonë. Tek korridori motori duhet të ecë ngadalë. Në rast se ai e tejkalon shpejtësinë ne ia fikim motorin nga këtu. Pastaj kemi një flamur, i cili duhet të kalohet për të bërë xhiron, pra thellë, ku njerëzit nuk lejohet të lahen. Kemi dhe një person që i kontrollon të gjithë nga bregu dhe na informon për çdo motor”, thotë Xhuljan Zuna.

Ndërsa rastet e aksidenteve që përfundojnë në tragjedi po bëhen gjithnjë e më të shpeshta, nga Golemi kuptohet qartë se gjithçka duhet bërë është vetëm ndjekja rigoroze e rregullave.

LEXONI GJITHASHTU

• VIDEO | Manovra të rrezikshme me mjete lundruese në plazhet e Durrësit
• Mjetet lundruese, Ndreu: Kemi hequr patenta të dhëna nën moshë dhe abuzivisht
• Ish-polici Arjan Tase do hetohet për vrasje nga pakujdesia