Serbia shpall gjendje të jashtëzakonshme në Beograd, masa të reja anticovid

Serbia ka shpallur gjendje të jashtëzakonshme në Beograd, pasi ditët e fundit ka pasur një rritje të madhe të shkallës të të infektuarve me Covid-19. Vendimi u mor pas sugjerimit nga shtabi i emergjencës, pasi 82.5% e të infektuarve janë regjistruar në kryeqytet.

Qeveria serbe ka vendosur masa të reja për Beogradin për të parandaluar përhapjen e mëtejshme të coronavirus, masa të cilat do të jenë në fuqi deri më 18 korrik.

Nga këto masa parashikohet mbyllja e të gjitha lokaleve, restoranteve dhe klubeve të natës nga ora 11 e mbrëmjes deri në 6 të mëngjesit.

Në të gjitha hapësirat e mbyllura, pa përjashtim të gjithë duhet të mbajnë maskë dhe të ruajtën distancën prej 1.5 metra.

Mbajtja e maskës është e detyrueshme dhe në transportin publik. Të gjithë ata që do të kapen në shkelje, do të gjobiten me 50 euro.

Në 24 orët e fundit në Serbi janë zbuluar 309 raste të reja me COVID-19 nga testimi i mbi 8 mijë personave. Në të gjithë vendin aktualisht janë mbi 2 mijë raste aktive ndërsa 85 persona janë në respirator. Në total, deri tani Serbia ka pasur mbi 15 mijë raste me coronavirus, ndërsa numri i vdekjeve është 292.