I kërkuan favore seksuale një shtetaseje në këmbim të automjetit të sekuestruar, ndalohen 2 policë të Rrugores

Dy efektivë të policisë rrugore janë ndaluar nga SHÇBA me urdhër të Prokuroria e Posaçme Kundër Korrupsionit dhe Krimit të Organizuar (SPAK), për akuzën e “Korrupsion pasiv i personave që ushtrojne funksione publike” dhe “Shpërdorim i detyrës, kryer në bashkëpunim”.

Përmes një njoftimi të shpërndarë për mediat policia bën me dije se shtetasi H.Z., me detyrë oficer i Policisë Gjyqësore pranë Komisariatit Rajonal të Policisë Rrugore Tiranë dhe L.D., me detyrë shef Seksioni për Verifikimin e Shkeljeve Administrative, u ndalua pas disa muajsh hetime me metoda speciale.

“Nga hetimet e deritanishme është e provuar dhe dokumentuar proceduralisht se dy punonjësit, gjatë ushtrimit të detyrës në këmbim të dorëzimit të automjetit në pronësi të një shtetaseje të sekuestruar në cilësinë e provës materiale për një ngjarje ndodhur në shtator 2019, i kanë kërkuar përfitime të jashtëligjshme në formë ryshfeti dhe favore seksuale.

Ndër të tjera janë siguruar prova se me veprimet dhe mosveprimet me dashje, në një periudhe kohore relativisht të gjatë, kanë zvarritur procedurat ligjore të dorëzimit të automjetit me qëllim përfitimin e favoreve të mësipërme, duke konsumuar elementë të shpërdorimit të detyrës dhe të korrupsionit pasiv. Hetimet vijojnë”, bën me dije policia.