Katër anije të tjera me grurë nisen nga portet e Ukrainës

Katër anije të tjera që transportonin grurë dhe vaj luledielli janë larguar nga portet e Ukrainës nëpërmjet një korridori të sigurt detar.

Anijet u nisën të dielën nga portet e Odesës dhe Chornomorsk dhe do të udhëtojnë përmes ngushticës së Bosforit.

Miliona tonë grurë kanë ngecur në Ukrainë për shkak të bllokadave ruse, duke çuar në mungesa dhe çmime më të larta të ushqimeve në vende të tjera, shkruan BBC.

Por javën e kaluar, u largua nga portet e Ukrainës anija e parë që nga fundi i muajit shkurt, kur nisi agresioni rus.

Presidenti ukrainas, Volodimir Zelenski përshëndeti rifillimin e eksporteve, por tha se shqetësimet e sigurisë mbeten prezente.

Anijet e fundit që do të lundrojnë janë të destinuara për në Turqi, ku do të inspektohen si pjesë e një marrëveshjeje të arritur me Rusinë dhe Kombet e Bashkuara.

Ukraina dhe Rusia kanë arritur marrëveshje për eksportet e grurit, nën ndërmjetësim të Turqisë dhe Kombeve të Bashkuara më 22 korrik. Sipas marrëveshjes, Rusia është pajtuar që të mos shënjestrojë anijet në transit.

LEXONI GJITHASHTU

• ‘Evropa t’i jetë mirënjohëse Turqisë për grurin’, Putin falenderon Erdogan
• Anija e parë me grurë niset nga porti i Odesës