Aktualitet | Vendi

2 viktima dhe 68 raste të reja me COVID-19 në Shqipëri

8 Korrik 2020 | 08:36

Ministria e Shëndetësisë raportoi të mërkurën për vdekjen e 2 pacientëve të tjerë me COVID-19 në Spitalin Infektiv dhe diagnostikimin e 68 rasteve të reja.

Në një konferencë për shtyp nga ministria, Genta Qirjako nga Instituti i Shëndetit Publik tha se viktimat ishin të moshave 58 dhe 59 vjeç nga Tirana, çka e çon në 83 totalin zyrtar të vdekjeve nga pandemia në Shqipëri (vdekshmëria ka shkuar në 2.7 për qind e të infektuarve).

Prej 1 qershorit janë shënuar 50 vdekje ndër pacientët me COVID-19 në Shqipëri – 60% më shumë se periudha tremujore mars-maj që pati 33 viktima.

Pas 397 testimesh në 24 orët e fundit, rezultuan të infektuar edhe 68 persona të tjerë, duke e çuar totalin në 3,106 të infektuar.

Qirjako tha se në Spitalin Infektiv janë të shtruar, 83 pacientë, 10 në terapi intensive, 4 në gjendje të rëndë.

Së fundmi autoritetet deklaruan “të shëruar” 47 persona duke e çuar totalin në 1,791 persona që kanë mundur ta mposhtin virusin (58% e totalit të të infektuarve).

Aktualisht janë 1,232 raste “aktive”: 488 në Tiranë, 222 në Durrës, 161 në Shkodër, 120 në Vlorë, 65 në Lezhë, 42 në Fier, 31 në Korçë, 56 në Elbasan e Kukës, 20 në Berat, 15 në Gjirokastër, 12 në Dibër.

Ndryshe nga javët e fundit, ministria e Shëndetësisë raportoi sot të ndara numrin total të testeve.

Kështu në total janë kryer 26,686 teste me tamponë dhe 4010 teste serologjike – 30,696 totali.

Testi serologjik – që shqyrton antitrupat përmes analizimit të gjakut, – nisi të kryhej më 18 prill me rreth 6 mijë kite testesh të siguruara nga autoritetet për testimin e personelit shëndetësor.

Prej datës 10 qershor ministria e përmblidhte totalin e testeve të kryera.

Lexoni gjithashtu:

Shqipëria e përball valën e dytë të COVID-19 me numrin më të ulët të testeve në rajon

Shqipëria e ka humbur kontrollin e COVID-19, paralajmëron eksperti i shëndetit publik Erion Dasho

‘90 mijë teste në dispozicion’, ministrja e shëndetësisë i përgjigjet akuzave për keqmenaxhim të pandemisë

Radhët në institucionet shtetërore, asnjë masë për ruajtjen e distancimit fizik nga COVID-19