Biden firmos draftin, 700 miliardë dollarë për klimën, medikamentet dhe taksat

Presidenti amerikan Joe Biden ka nënshkruar një draft me vlerë 700 miliardë dollarë, që synon të luftojë ndryshimet e klimës dhe kostot e shëndetësisë, si dhe rritjen e taksave për të pasurit.

Akti përfshin masa për t’i dhënë jetë premtimeve disavjeçare të Kongresit për të kufizuar çmimin e ilaçeve me recetë.

Sidoqoftë, versioni final i tij është më modest se synimi fillestar i demokratëve, që kishin parashikuar një vlerë prej 3.5 trilionë dollarësh.

Megjithatë, nënshkrimi i draftit është një lëvizje e rëndësishme e administratës Biden, që mund të ndikojë pozitivisht në zgjedhjet e mesmandatit.

Në procesin elektoral të nëntorit, votuesit do të vendosin nëse demokratët e udhëhequr nga Biden do të ruajnë kontrollin e Kongresit për dy vite të tjera.

Vetë presidenti e përshëndeti draftin e nënshkruar, duke e cilësuar atë si “copëzën finale” të agjendës së tij të brendshme.

Më shumë se gjysma e vlerës së paketës do të shkojë për të luftuar ndryshimet e klimës. Bëhet fjalë për investimin më të madh federal në histori.

Shkencëtarët deklarojnë se shuma e madhe nuk do të reduktojë masivisht ngrohjen globale, por do të ketë ndikimin e saj.

LEXONI GJITHASHTU

• Biden nënshkruan protokollin për anëtarësimin e Suedisë dhe Finlandës në NATO
• ‘Në SHBA nuk ka vend për urrejtje’, Biden dënon vrasjen e katër myslimanëve