Prokuroria Speciale, 100 shtetas nga Kosova të thirrur në Gjykatën e Hagës

Prokuroria e Specializuar për krime të luftës në Kosovë, me seli në Hagë, deri më tani, ka ftuar për intervistim rreth 100 persona, ndër ta edhe disa nga ish-figurat e larta të UÇK-së, që pas luftës, ishin dhe janë pjesë e skenës politike të Kosovës.

Ndër emrat e njohur të thirrur për t’u pyetur në Hagë janë Rrustem Mustafa, Sami Lushtaku, Shukri Buja, por edhe kryeministri në detyrë, Ramush Haradinaj.

Veç tyre nga Gjykata u thirrën edhe Azem Syla, Jakup Krasniqi, Kadri Kastrati, Abelard Tahiri, Ibrahim Gashi, Time Kadriaj, Isni Kilaj etj.

Dhomat e Specializuara dhe Zyra e Prokurorisë së Specializuar, janë përgjegjëse për hetimin e krimeve kundër njerëzimit, krimeve të luftës dhe krimeve tjera penale në lidhje me akuzat nga Raporti i Këshillit të Evropës i vitit 2011, në të cilin flitet për krimet e pretenduara se i kanë bërë pjesëtarët e Ushtrisë Çlirimtare të Kosovës, në periudhën prej vitit 1998 e deri në vitin 2000.