‘Gratë i prisnin jashtë’, policia jep detaje nga arrestimi i çekëve në Poliçan

Policia e qarkut të Beratit, ku përfshihet edhe Poliçani ka dhënë detaje rreth incidentit të ndodhur sot në ish-uzinën e armëve, ku u arrestuan 4 shtetas çekë teksa fotografonin në ambientet e kësaj uzine.

Përmes një njoftimi për mediat policia sqaron se fillimisht në ambientet e jashtme të Uzinës Ushtarake Poliçan janë konstatuar shtetaset P. B., 38 vjeçe dhe M. M. (G), 34 vjeçe, me kombësi çeke, me aparat fotografik.

“Shërbimet e Policisë në bashkëpunim dhe me Policinë Ushtarake, pas informacioneve të marra se në brendësi të tuneleve të Uzinës, ndodhen dhe dy shtetas të tjerë, kanë ushtruar menjëherë kontroll të imtësishëm. Në brendësi të njërit prej tuneleve, gjatë kontrollit, janë konstatuar dhe dy shtetasit e tjerë, TH. M., 51 vjeç, dhe R. B., 42 vjeç, të dy me kombësi çeke”, thotë policia.

Ngjarja vjen vetëm një ditë pas incidentit të ndodhur në ish-uzinë e armëve në Gramsh ku dy shtetas rusë dhe 1 ukrainas tentuan të hyjnë mbrëmjen e së shtunës.

Ata sulmuan me spray neuro-paralizues dy ushtarët shqiptarë që ndodheshin në uzinë.

Në dëshminë e tyre, shtetasit e huaj kanë thënë se janë blogerë dhe fotografonin kryesisht territore ushtarake që janë të braktisura dhe nuk përdoreshin më nga shteti.

LEXONI GJITHASHTU:

• Arrestimi i 4 çekëve në uzinën e Poliçanit, reagon Ministria e Mbrojtjes
• Euronews Albania siguron foton e njërit prej çekëve të arrestuar në Poliçan