Mbahet video konferenca Hoti-Vuçiç, të enjten takohen në Bruksel

Të dielën paradite pritet të rinisë dialogu mes Beogradit dhe Prishtinës përmes një video-konference, që do të ndërmjetësohet nga Bashkimi Evropian. Ky do të jetë takimi i parë i një niveli të lartë të dialogut që nga vitit 2018. Video-konferenca do të pasohet nga një takim i programuar për t’u zhvilluar në Bruksel në datën 16 korrik.   

Dialogu mes Kosovës dhe Serbisë do të udhëhiqet nga Nënkryetari i Komisionit Evropian, Josep Borrell së bashku me përfaqësuesin Special të BE-së për Dialogun dhe çështje të tjera të rajonit të Ballkanit Perëndimor, Miroslav Lajčák.

Presidenti i Serbisë Aleksandar Vuçiç do të lidhet nga distanca nga Beogradi ashtu si dhe kryeministri i Kosovës Avdullah Hoti I cili do të jetë në Prishtinë.

Dialogu është planifikuar të fillojë në orën 10:00. Përfaqësuesi i Lartë, Miroslav Lajčák do të mbajë një konferencë si para ashtu dhe në fund të video-konferencës, ku do të përmbledhë diskutimet mes palëve.