Teatri i Kukullave shkon te liqeni, hapet tenderi me vlerë 9 mln euro

Teatri i Kukullave do të zhvendoset pranë Liqenit Artificial të Tiranës, mes zonës që njihet si Garda e Republikës.

Ministria e Kulturës ka vendosur që të ndërtojë nga e para një teatër për fëmijët dhe në të njëjtën godinë të integrohet Qendra Kombëtare e Kulturës për Fëmijë.

Në total projekti për ndërtimin e teatrit të ri do të kushtojë 9 milionë euro, ndërsa ndërtesa planifikohet të përfundojë pas dy vjetësh.

Në total sipërfaqja e godinës projektohet të jetë 900 m2 me një lartësi prej 30 metrash, në formë kubike.

Në dokumentet e tenderit të hapur për ndërtimin e Teatrit të ri, ministria e Kulturës tregon se do të marrë 50 mijë metra nga prona e Gardës së Republikës për të vendosur aty Qendrën Kulturore të Fëmijëve, Teatrin e Kukullave dhe më vonë në të njëjtën zonë projektohet edhe vendasja e Bibliotekës Kombëtare.

Aktualisht Qendra e Fëmijëve ndodhet në zonën e ish-Kinostudios dhe ka një destinacion të largët për t’u arritur nga të gjithë fëmijët, ndërsa godina e Teatrit të Kukullave do të ketë një kapacitet më të madh se 160 vendet e teatrit të vjetër.

Të kontaktuar nga Euronews Albania, zyrtarë të Ministrisë së Kulturës sqaruan se projekti do të nisë të zbatohet menjëherë pas përfundimit të tenderit dhe se teatri i vjetër i Kukullave është nën rikonstruksion për t’u kthyer në qendër kulture përmes projektit EU4 schools, pas dëmtimeve që mori nga tërmeti i nëntorit 2019.

LEXONI GJITHASHTU:

• ‘Politikani rus e akuzoi’, shoku i ‘spiunes’ së arrestuar tregon rastin në Moskë
• Ekskluzive/ Flet shoku i ruses së arrestuar për spiunazh
• ‘S’është ilegal’, miku i ruses së akuzuar tregon spray-n që u përdor ndaj ushtarëve