OBSH raporton rekord ditor të infektuarish me mbi 230 mijë raste të reja në botë

Numri total i rasteve të reja me coronavirus në botë u rrit me mbi 230 mijë gjatë së dielës, sipas Organizatës Botërore të Shëndetësisë – duke shënuar një rekord të ri ditor.

Pjesa më e madhe e këtyre 230,370 rasteve dhe 5,285 viktimave të regjistruara më 12 korrik ishin nga shtetet e Amerikës së Veriut dhe Jugut, pasi vetëm në SHBA u regjistruan 66,281 raste.

SHBA, shteti më i prekur në botë, tashmë ka më shumë se 3.3 milionë raste dhe 135 mijë të vdekur.

Rekordi i mëparshëm global për raste të reja në harkun kohor të 24-orëve u shënua në 10 korrik me 228 mijë raste.

Tri ditët e fundit kanë sjellë dhe tre shifrat më  të larta të rasteve të reja për një ditë.  

Numri aktual i rasteve të konfirmuara mendohet se është më i ulët sesa shifra reale e personave të infektuar me coronavirus, pasi shumë mbartës të virusit nuk janë testuar.

Rastet e reja janë rritur ndjeshëm edhe në Meksikë, Kili dhe Peru, duke regjistruar mijëra raste të reja gjatë javëve të fundit.

Gjatë fundjavës, Meksika ia kaloi Italisë duke u renditur në vend të katërt për numrin e viktimave nga COVID-19, e gjithashtu dhe Mbretërisë së Bashkuar për numrin total të rasteve duke u renditur në vend të shtatë në rang global.

Edhe vendet e Europës Lindore kanë parë një rritje të valës së COVID-19, çka ka sjellë kufizime të reja në Kroaci, Bullgari dhe Hungari.

Protestuesit janë përleshur me policinë në Serbi, pas përshkallëzimit të protestave si pasojë e menaxhimit të coronavirus nga presidenti Vucic.