PD akuza qeverisë se ndihmoi me garanci sovrane 10 kompani koncesionare

Partia Demokratike akuzoi të hënën qeverinë se ka mbështetur me programin e garancisë sovrane më së shumti kompanitë koncesionare.

Në një deklaratë për shtyp nga selia e PD-së, ish-deputetja Jorida Tabaku u shpreh se “qeveria vazhdon të kujdeset për koncesionarët, pavarësisht situatës që po kalon vendi”.

“Nën presionin e një krizë të dyfishtë ekonomiko-shëndetësore, Rama vazhdon të kujdeset posaçërisht duke mbrojtur 10 oligarkët e tij, rezulton se 50% e kredive të miratuara nga fondi i garancisë, u përkasin të dyshuarve të përhershëm, oligarkëve,” – u shpreh Tabaku duke iu referuar një hulumtimi të Rrjetit Ballkanik të Gazetarisë Hulumtuese (BIRN) kliko këtu për të lexuar hulumtimin.

Garancia sovrane, si paketë ekonomike e ofruar nga qeveria për zgjidhjen e situatës së mungesës së likuiditetit në treg, ishte një formë huamarrjeje në të cilën interesat merren për sipër të paguhen nga shteti.

Në hulumtimin e BIRN tregohej se deri më 29 maj, ishin miratuar 236 kredi me një vlerë prej rreth €32 milionë (3.9 miliardë lekë) dhe se 48 për qind e tyre (€15 milionë, 1.9 miliardë lekë) i kishin përfituar vetëm 10 kompani koncesionare.

“Ndërsa oligarkët e PPP-ve përfitojnë nga kjo garanci sovrane, sipërmarrje si fasoneritë apo hoteleri-turizmi që u detyruan te largonin me qindra punonjës nga puna nuk kanë përfituar asgjë,” – u shpreh ish-deputetja e PD-së duke e konsideruar këtë “jo rastësi”.

Sipas opozitë s qeveria “funksionon vetëm për një pakicë”. Në deklaratën e saj, Tabaku kujtoi kërkesat e PD-së për të pezulluar pagesat  e koncesioneve si mënyrë për të nxjerrë financa për paketat ekonomike anti-krizë.

“Rama jo vetëm që i pagoi ato për çdo ditë në kulmin e pandemisë, por ndërsa mijëra qytetare humbën dhe po vazhdojnë të humbasin vendet e punës, kryeministri në ikje po i shndërron të njëjtët përfitues edhe në përfituesit kryesor lë të garancisë sovrane, që mbulohet me paratë e taksapaguesve,” – u shpreh ish-deputetja e Tiranës duke e cilësuar situatën aktaule si “periudhën më të vështirë të 20 viteve të fundit” dhe se qeveria “punon vetëm për dy grupe: kriminelët dhe oligarkët”.

Lexoni gjithashtu:

Garancia e dytë sovrane prej 15 mld lekë, qeveria shpërndan fondet në 12 bankat e nivelit të dytë

Garancia sovrane, shtyhet afati i aplikimeve për kredi

Ndryshon garancia sovrane, eksperti i ekonomisë Azmi Stringa: Do ketë vështirësi për bizneset