‘SPAK, aneks i zyrës së Ramës’, Berisha reagon për hetimin ndaj Metës

Sipas kreut të Partisë Demokratike, Sali Berisha, kryeministri Edi Rama ka shkrirë në një të vetëm Shërbimin Informativ, Komisionin e Dosjeve të Sigurimit të Shtetit dhe SPAK-un.

Berisha thotë se Rama është duke fabrikuar informacione të rreme për kundërshtarët politik, konkretisht për Ilir Metën.

Sipas kryedemokratit, Rama frikësohet nga fati i tij pas “vjedhjeve” që u ka bërë shqiptarëve.

“Duke dënuar me forcën më të madhe këto akte të shëmtuara të regjimit mafioz të Edi Ramës, të bazuar në dhunimin e votës së qytetarëve, vjedhjen e papermbajtur te pasurive dhe fondeve publike, drogën dhe krimin, i them vasalit të Aleksander Vuçiç-it se je i pashpresë dhe se, nuk ka manipulim, shpifje apo falsifikim as dhe ligj i votuar nga mazhoranca kallpe që do të shpëtojë ty nga ndëshkimi i rëndë popullor,” – shkroi Berisha në faqen e tij zyrtare në Facebook.

Më 7 qershor, ish-deputeti Halit Valteri depozitoi në SPAK një kallëzim penal për ish-presidentin Ilir Meta, Monika Kryemadhin dhe Vangjel Tavon.

Ai i akuzon ata për korrupsion aktiv dhe pasiv në sektorin privat, për fshehje të pasurisë, mospagim të taksave dhe tatimeve dhe shpërdorim detyre.

LEXONI GJITHASHTU:

• ‘Ramën nuk e shpëton asgjë’, reagon Ilir Meta për nisjen e hetimeve nga SPAK