Manjola Kajana betohet si prokurore e SPAK

Nga sot Manjola Kajana është zyrtarisht prokurore e Prokurorisë së Posaçme kundër Korrupsionit dhe Krimit të Organizuar (SPAK).

Kajana zhvilloi pasditen e së martës ceremoninë e betimit në Presidencë duke marrë kështu plotësisht detyrën pas emërimit nga Këshilli i Lartë i Prokurorisë (KLP).

Zyra për shtyp e Presidentit Ilir Meta shpërndau foto nga ceremonia, ndërsa Kajana “u betua solemnisht se gjatë kryerjes së detyrës do t’i qëndrojë besnike Kushtetutës dhe ligjeve në fuqi”.

Presidenti Meta i uroi asaj suksese dhe punë të mbarë duke i kërkuar të ushtrojë detyrën në mënyrë profesionale dhe të pavarur.

Në ceremoninë e betimit ishin të pranishëm edhe kryetari i KLP-së Gent Ibrahimi, si dhe Kryetari i SPAK-ut, Arben Kraja.

Kajana, e cila u konfirmua në detyrë nga procesi i rivlerësimit  të zyrtarëve të drejtësisë (vetingu) më 19 qershor të vitit të kaluar, do të ketë kështu një mandat 9-vjeçar si prokurore e SPAK-ut.

Ajo ka kryer studimet në Shkollën e Magjistraturës në vitin 2009, më pas ka punuar si prokurore në Fier. Prej vitit 2014 ishte prokurore në Prokurorinë e Shkallës së Parë për Krimet e Rënda.

Kajana ishte një nga dhjetëra kandidatet që shprehën interesin për t’u emëruar në SPAK. Me emërimin e saj Struktura bëhet me 13 prokurorë, figurat e të cilave janë shqyrtuar nga procesi i vetingut.

Aktualisht mbeten ende pa u verifikuar prokurorët Anton Martini dhe Elizabeta Imeraj, çka nëse konfirmohen do ta plotësonin SPAK-un me 15 prokurorë.

Lexoni gjithashtu:

Këshilli i Lartë i Prokurorisë emëron Manjola Kajanën prokurore në SPAK

Dyshime për të infektuar, testohen gjyqtarë dhe prokurorë të SPAK

Dosja e Llallës i kthehet SPAK, Gjykata: Prokuroria duhet të kryejë hetime shtesë për ish-kryeprokurorin

Rekomandimet për Prokurorinë, Çela: Gjyqtari paraprak cenon kompetencat e prokurorit, ndikon në hetim