Frika për një Çernobil në Zaporizhia, inspektorët e OKB-së zbarkojnë në Kiev

Inspektorët e Agjencisë Ndërkombëtare të Energjisë Atomike, që do të mbikëqyrin sigurinë në impiantin bërthamor të Zaporizhias, ndodhen në Kiev.

Bëhet fjalë për një mision të komplikuar në një zonë luftë që do të nisë këtë javë, kur ekipet të nisen drejt qytetit Energodar.

Ai vjen pas një sërë negociatave, gjatë të cilave ukrainasit dhe rusët akuzuan njëri-tjetrin për sulme ndaj centralit.

“Shpresojmë që ky mision do të zhvillohet sikurse u ra dakord. E përsëris, ne jemi të interesuar për zhvillimin e tij dhe e kemi pritur prej kohësh”, tha Dmitry Peskov, zëdhënës i Kremlinit.

Mundësia për një Çernobill të ri shqetëson Bashkimin Evropian, që ka dhuruar 5.5 milionë tableta jodur kaliumi për Ukrainën. Por kjo nuk është vetëm ajo çka Brukseli kërkon të ofrojë.

“Kjo lojë bërthamore në centralin atomik të Zaporizhias është shumë e rrezikshme. Situata në terren vijon të jetë problematike. Ukraina ka nevojë për mbështetjen tonë dhe ne do vazhdojmë t’i ofrojmë asaj këtë mbështetje, përfshirë në aspektin ushtarak, duke diskutuar idenë për stërvitjen e nivelit të lartë të ushtrisë ukrainase”, u shpreh Josep Borrell, përfaqësues i Lartë i BE-së.

Inspektorët e OKB-së jo vetëm do të vizitojnë pjesët e dëmtuara të impiantit, por edhe kushtet e personelit ukrainas, që prej muajsh mbahet nën kontrollin e trupave ruse.

LEXONI GJITHASHTU:

• Forcat ruse bombardojnë qytetet ukrainase rreth centralit të Zaporizhias
• Zyrtari ukrainas: Rreziku i katastrofës bërthamore në Zaporizhia po rritet çdo ditë