Ndeshja e parë në Arenën Kombëtare, stadiumi i ri hap dyert për herë të parë me një ndeshje femrash

Arena Kombëtare priti ndeshjen e parë zyrtare mbrëmjen e10 nëntorit, teksa në impiantin më të ri në kryeqytet zbritën në fushë skuadrat e femrave të Vllaznisë dhe Apolonisë. Në ndeshjen e fituar nga vajzat shkodrane me rezultatin 2-0, vëmendja ishte e gjitha tek stadiumi i ri.

Federata Shqiptare e Futbollit kishte përzgjedhur këtë sfidë për të testuar stadiumin e ri, duke i dhënë mundësinë përfaqësuesve të UEFA-s që të bënin vlerësimin nëse “Arena Kombëtare” i ka kapacitetet për të pritur një ndeshje zyrtare.

Sipas informacioneve, shtëpia e re e Kombëtares e ka kaluar testin dhe ndeshja mes Shqipërisë dhe Francës do të luhet në këtë stadium. Në ndeshjen testuese, gjithçka funksionoi si një ndeshje zyrtare, pavarësisht se për këtë përballje nuk kishte dalë asnjë biletë në treg. Të gjithë të pranishmit në stadiumin e ri ishin nxënës të shkollave të kryeqytetit, si dhe persona të afërt pranë FSHF-së. 

Ndonëse leja për të zhvilluar ndeshjen me Francën është marrë, në stadiumin e ri ka ende punë për t’u bërë, kryesisht në tribunën VIP, ku vijon të punohet me intensitet.